Қазақстанның бірқатар өңірлеріндегі күрделі су тасқыны жағдайының салдарынан 88 білім беру мекемесі 4-ші тоқсанды онлайн форматта бастайды. ҚР Білім беру министрлігінің мәліметінше, қазіргі уақытта эвакуацияланған азаматтар орналастырылған 56 білім беру мекемесі мен 32 мектепте қашықтықтан оқыту ұйымдастырылған. Оқу үдерісі мемлекеттік жалпы білім беру стандартына сәйкес ұйымдастырылатыны атап өтілді.
«Қазақстан Республикасы Білім беру министрлігінің білім беру саласындағы сапаны қамтамасыз ету жөніндегі аумақтық басқармалары, сондай-ақ облыстық білім басқармалары жергілікті жерлерде жұмыс істейді», — деп атап өтті ведомствоның ресми өкілі Мереке Амангелдіқызы.
Премьер-Министр Олжас Бектеновтың жетекшілігімен Су тасқынына қарсы іс-шараларды үйлестіру және су тасқыны кезеңінің зардаптарын жою жөніндегі республикалық штаб отырысы барысында төтенше жағдай аймағынан 11 306 адам эвакуацияланғаны, оның 5 456-сы уақытша орналастыру орталықтарында екені айтылды.
Қазір су шайған жолдар мен көпірлерді қалпына келтіру жұмыстары жүргізілуде.