Наурыздың соңында Астанада төмен көміртекті экономикаға кедергісіз көшуді қамтамасыз етуге бағытталған «Chapter Zero» жаһандық бастамасы іске қосылды. Бұл бастама қазірдің өзінде әлемнің 70-тен астам елінде дамып келеді.

Еуропалық бизнесті басқару институты Insead «Chapter Zero Kazakhstan» жобасымен бірлесіп Республика мен жалпы Орталық Азия үшін Корпоративтік басқару бағдарламасын әзірлемек. Әріптестер «Астана» халықаралық қаржы орталығы, Еуропалық қайта құру және даму банкі, McKinsey, KPMG және Назарбаев университеті болады.

McKinsey & Company – стратегиялық менеджментке қатысты мәселелерді шешуге маманданған халықаралық консалтингтік компания.

KPMG – халықаралық аудит және консалтингтік корпорация.

«Төмен көміртекті даму тұрақты дамудың алғышарты болып табылады және жаһандық климаттық өзгерістердің апатты салдарын болдырмауға бағытталған. Елімізде жаңартылатын және баламалы энергия көздерін дамыту бойынша бірқатар жобалар бар. Мемлекет басшысының тапсырмасы бойынша Қазақстанның 2060 жылға дейінгі төмен көміртекті даму тұжырымдамасы әзірленді. Бұл жобаларды жүзеге асыру қоршаған ортаның сапасын жақсартуға, климаттың өзгеруінен туындайтын қиындықтардың алдын алуға, технологиялық дамуға, жаңа жұмыс орындарын құруға, экономикада көміртекті пайдалануды азайтуға және басқа да маңызды мәселелерге ықпал етеді. Қазақстанда алғаш рет жұмысын бастағалы отырған Chapter Zero Kazakhstan бастамасы өте маңызды қадам деп есептейміз», — деді Қазақстан Республикасы Энергетика вице-министрі Бақытжан Ілияс.