Ўзбекистон Республикаси Президенти Шавкат Мирзиёев 3 май куни учинчи Тошкент халқаро инвестиция форумида иштирок этиш учун мамлакатда бўлиб турган Мисрнинг «Orascom Investment Holding» компанияси раиси Нагиб Савирисни қабул қилди.
Учрашувда ўзаро манфаатли ҳамкорликни янада ривожлантириш ва илгари эришилган келишувларга мувофиқ қўшма лойиҳаларни илгари суриш масалалари муҳокама қилинди. Ўзбекистон иқтисодиётининг турли тармоқлари, жумладан, тоғ — кон саноати, озиқ-овқат саноати, туризмни ривожлантириш, қурилиш, инфратузилма ва бошқа соҳалардаги лойиҳаларни амалга ошириш учун тўғридан-тўғри инвестициялар жалб этишга алоҳида эътибор қаратилди.
«Orascom Investment Holding» раиси Нагиб Савирис Мисрнинг Ўзбекистон иқтисодиётига инвестициялари ҳажмини ошириш учун барча саъй-ҳаракатларни амалга оширишга тайёрлигини билдирди. Томонлар ҳамкорликни янада кенгайтириш ва икки мамлакат тараққиётига хизмат қилувчи қўшма лойиҳаларни амалга оширишга алоҳида эътибор қаратиш муҳимлигини таъкидладилар.
Сурат: Ўзбекистон Ташқи ишлар вазирлиги