Қазақстан Республикасының Премьер-министрі Олжас Бектенов «Қазақстан – Еуроодақ» диалогтық платформасының 14-ші отырысын өткізді. Іс-шараға Еуропалық Одаққа мүше мемлекеттердің дипломатиялық миссияларының басшылары, сондай-ақ Еуропалық бизнес өкілдері қатысты.
Тараптар сауда-экономикалық және инвестициялық өзара іс-қимыл мәселелерін, су ресурстарын басқару және ауыл шаруашылығын дамыту саласындағы жұмыс перспективаларын талқылады.
«Мемлекет Басшысы Қасым – Жомарт Тоқаев Үкімет алдына агроөнеркәсіптік кешенді дамыту және су ресурстарын ұтымды пайдалануды қамтамасыз ету міндетін қойды. Ауыл шаруашылығы және тамақ өнеркәсібі экономикамыздың маңызды секторларының бірі болып табылады. Бізде жоғары сапалы және органикалық ауыл шаруашылығы өнімдерін, сондай-ақ азық-түлік өнімдерін өндірудің зор әлеуеті бар. Біз ЕО нарығына азық-түлік экспортын ұлғайтуға мүдделіміз. Еуропалық компаниялардың озық аграрлық технологияларын ескере отырып, АӨК өнімдерін өндіру және қайта өңдеу бойынша бірлескен жобаларды құруға шақырамыз. Біз өз тарапымыздан бизнес жүргізу үшін қолайлы орта құру бойынша барлық күш — жігерімізді жұмсауға дайынбыз», — деп атап өтті Олжас Бектенов.
О. Бектенов Қазақстан өңірлеріндегі ағымдағы су тасқыны жағдайын ескере отырып, тұрақты су инфрақұрылымын дамыту үшін ЕО елдерімен ынтымақтастықты кеңейту қажеттігін атап өтті.
«Табиғи апаттың ауқымы мен салдары бізден ресурстарды дұрыс пайдалану және болашақта осындай оқиғалардың алдын алу үшін түбегейлі жаңа тәсілдерді талап етеді. Бұл мәселеде бізді Еуропа елдері мен компанияларының озық тәжірибесі мен дамуы ерекше қызықтырады. Қазақстан үкіметінің күш — жігерін Еуроодаққа жәрдемдесу бағдарламаларымен үндестіру маңызды», — деп атап өтті Олжас Бектенов.
Қазіргі уақытта Қазақстан Үкіметі су ресурстарын басқару жүйесін дамытудың жаңа тұжырымдамасын іске асыруда. Оның орындалуы суды тасымалдау кезінде өнімсіз шығынның азаюына, суармалы жерлердің жай-күйін мониторингтеу жүйесін жақсартуға, сондай-ақ төтенше жағдайлардың туындау қаупін азайту үшін Гидротехникалық құрылыстарды жаңғыртуға әкеледі деп күтілуде.