Қазақстанның вице-премьері Серік Жұманғарин мен Ауғанстанның Мұнай және шахталар министрі Шахабуддин Делавар геологиялық барлау және пайдалы қазбаларды өндіру саласындағы ынтымақтастықтың перспективаларын талқылады. Сондай-ақ, кездесуге қазақстандық ERG Exploration және Kazakhmys Barlau компанияларының өкілдері қатысты.

«ERG Exploration» ЖШС компаниясы геологиялық барлау жұмыстарының толық циклін – жобалау, далалық және геофизикалық жұмыстардан, Ұңғымаларды бұрғылаудан бастап кен орындарын модельдеуге және халықаралық стандарттар бойынша есептер дайындауға дейінгі құзыреттер орталығын ұйымдастыру үшін құрылған.

Kazakhmys Barlau — геологиялық барлау компаниясы

Келіссөздер қорытындысы бойынша екі ел арасында техникалық комитет құру туралы шешім қабылданды. Сондай-ақ ауған тарабы Қазақстанға өз елінің аумағындағы перспективалы кен орындары бар карталарды беру туралы мәлімдеді.

Айта кету керек, Ауғанстанда мұнай, табиғи газ, көмір, темір және түрлі-түсті кен, сирек кездесетін металдардың мол қоры бар.

Қазақстан өз тарапынан құрылыс-монтаждау жұмыстары, Ұңғымаларды күрделі жөндеу, сараптама, зертханалық зерттеулер, сондай-ақ жобалау, инжиниринг және бұрғылау саласында мұнай сервисі және өндіруші компаниялардың әзірлемелері мен озық тәжірибесін ұсынуға дайын.