Премьер-Министрдің орынбасары – Ұлттық экономика министрі Нұрлан Байбазаров Қазақстан астанасында Дүниежүзілік банк пен Халықаралық қаржы корпорациясының өкілдерімен кездесті.

Кездесу барысында экологиялық жобаларға бөлінген инвестициялық жобалар мен гранттарды іске асыру, сондай-ақ ынтымақтастықтың жаңа бағыттарының перспективалары талқыланды.

Нұрлан Байбазаров Дүниежүзілік банкпен өзара іс-қимыл шеңберінде мемлекеттік-жекешелік әріптестікті дамыту және инфрақұрылымға инвестициялар тарту мәселелеріне ерекше назар аударуға ниетті екенін атап өтті. Сондай-ақ, Қазақстан Үкіметін консультациялық қолдау шеңберінде Дүниежүзілік банк іске асыратын бірлескен экономикалық зерттеулер бағдарламасын жалғастырудың маңыздылығы атап өтілді.

«Дүниежүзілік банк тобы 30 жылдан астам уақыт бойы біздің еліміз үшін маңызды стратегиялық серіктестердің бірі және ең ірі жеке капитал көзі болып табылады. Біз әріптестіктің қалыптасқан дәстүрлерін сақтап, жаңа бірлескен жобаларды дамытуға ниеттіміз»,-деп атап өтті вице-премьер.

Өз кезегінде Банк пен ХҚК өкілдері Республика Үкіметінің тұрақты және инклюзивті экономиканы дамытуға, экологиялық жағдайды жақсартуға бағытталған іс-қимылдарына қолдау білдірді, сондай-ақ осы бағыттардағы жобаларды қарауға дайын екендіктерін растады. Дүниежүзілік банк тобы сонымен қатар тұрмыстық қалдықтарды қайта өңдеу, инфрақұрылымды қайта құру, Ауыл шаруашылығын, су және энергетика салаларын дамыту, Арал теңізін қалпына келтіру, ғылым мен білім беруді дамыту жөніндегі жобаларды қаржыландыруға қызығушылық танытты.

Сондай-ақ, Қазақстан Орталық Азия үшін Cawep су-энергетикалық бағдарламасына белсенді қатысуға шақырылды, ол климаттың өзгеру жағдайында өңірдің су-энергетикалық қауіпсіздігін арттыру үшін жағдай жасауға бағытталған.

Фото: Қазақстан Республикасы Премьер-Министрінің ресми ақпараттық ресурсы