Қасым-Жомарт Тоқаев Дүниежүзілік сауда ұйымының (ДСҰ) Бас директоры Нгози Оконджо-Ивеаломен сауда мен экономикалық ынтымақтастықты дамыту перспективаларын талқылау үшін кездесті.

«Осы мүмкіндікті пайдалана отырып, мен Сізге тығыз ынтымақтастық үшін ризашылығымды білдіргім келеді. Қазақстан үшін 12-ші министрлік конференциясына төрағалық ету үлкен жауапкершілік пен мәртебе болды, оның барысында ДСҰ мүшелері ұйымды реформалау туралы маңызды шешімдер қабылдай алды», – деді Қазақстан Президенті.

Мемлекет басшысы адал бәсекелестікті нығайтуға, кәсіпкерлікті қорғауға және мемлекеттің экономикаға араласуын қысқартуға бағытталған экономиканыераықтандыру туралы Жарлыққа қол қойылғанын хабарлады. Ол жаһандық протекционизмге қарамастан, Қазақстан сыртқы сауданың көлемін ұлғайта отырып, ашық экономикасы бар ел ретінде өз ұстанымын нығайтатынын атап өтті.

Өз кезегінде Нгози Оконджо-Ивеала Қазақстанның халықаралық сауда саласындағы негізгі шешімдерді қабылдаудағы рөлін жоғары бағалады және өңірлік ынтымақтастықты ілгерілету үшін Орталық Азияның сауда саясаты жөніндегі Форумның маңыздылығын атап өтті.

Республика Президенті Нгози Оконджо-Ивеалуды көпжақты сауда жүйесін нығайтуға қосқан үлесі және ДСҰ-ның жаһандық рөлі үшін II дәрежелі «Достық» орденімен марапаттады. Қазақстан мен ДСҰ арасындағы стратегиялық әріптестік ынтымақтастыққа және халықаралық сауданы дамытуға деген ортақ ұмтылысты көрсете отырып, дамуын жалғастыруда.

Фото: Қазақстан Республикасы Президентінің ресми сайты