Қазақстан Республикасының Өнеркәсіп және құрылыс министрі Қанат Шарлапаев «Корея геологиялық ғылымдар және минералдық ресурстар институтының» (KIGAM) Президенті Сеокчжун Ли және «SK ECOPLANT» вице-президенті Пайк Хансонмен кездесті.

Корей компанияларының өкілдері іске асырылған жобалар мен ықтимал ынтымақтастықтың перспективалары туралы ақпарат ұсынды. Олар бірлескен геологиялық барлау жұмыстарын жүргізуге және литий өндіруге қызығушылық танытты.

Сонымен қатар, KIGAM Президенті республика аумағында литий карбонаты мен литий гидроксиді өндіретін кәсіпорын салу жоспарын жариялады.

Қ. Шарлапаев Қазақстанның жобаларды іске асыру үшін мемлекет тарапынан қажетті қолдау шараларын көрсетуге дайын екенін атап өтті. Сонымен қатар, Астанада кеңейтілген кеңес өткізу туралы шешім қабылданды.

Бұған дейін KIGAM «Қазгеология» АҚ-мен бірге Бакенное кен орындарында геологиялық түсіру және геофизикалық жұмыстар жүргізген болатын. Осы кен орнында барлауға және өндіруге лицензия беру мәселесі қарастырылуда.

Фото: Қазақстан Республикасы Өнеркәсіп және құрылыс министрлігі