Қазақстанда Президент Қасым-Жомарт Тоқаевтың тапсырмасы бойынша жылу-энергетикалық кешенді жаңғырту жұмыстары жүргізілуде.

Үкімет резервінен Кентау, Риддер және Қызылорда қалаларының жылу көздерін реконструкциялауға және күрделі жөндеуге шамамен 16 млрд теңге бөлінді.

Осы кезеңде Кентау қаласында қазандықтарды реконструкциялау (9 млрд теңге), Риддер жылу электр орталығының (ЖЭО) технологиялық жабдықтары мен инфрақұрылымын күрделі жөндеу (4,9 млрд теңге) және Қызылордадағы Оңтүстік қазандықтың 3 бу қазандығын (2 млрд теңгеден астам) реконструкциялау жоспарлануда.

2024 жылы Астана, Алматы, Шымкент, Атырау, Өскемен, Қарағанды, Ақтау, Тараз, Петропавл, Павлодар, Жезқазған, Ақтөбе, Екібастұз, Степногорск, Рудный, Балқаш және Ақсу қалаларында барлығы 10 Энергия блогын, 55 қазандық пен 45 турбинаны жөндеу жоспарлануда.

Сонымен қатар, Екібастұз ГРЭС-1-де №1 Энергия блогын қалпына келтіру және Атырау ЖЭО мен Топар ГРЭС-на турбоагрегаттарды ауыстыру бойынша жұмыстар жүргізілуде. Екібастұз ГРЭС-на №3 энергоблок салу, Өскемен ЖЭО және Қарағанды ЖЭО-3 кеңейту жоспарлануда.

Аталған барлық іс-шаралар мен жобалардың орындалуы 1500 МВт-тан астам жаңа қуаттардың іске қосылуын қамтамасыз етеді деп күтілуде.