Қозоғистон Республикаси Саноат ва қурилиш вазири Канат Шарлапаев “Корея Геология фанлари ва минерал ресурслар институти” (KIGAM) Президенти Сеокжун Ли ва “SK ECOPLANT” вице-Президенти Пайк Хансон билан учрашди.

Корея компаниялари вакиллари тугалланган лойиҳалар ва мумкин бўлган ҳамкорлик истиқболлари тўғрисида маълумот беришди. Улар биргаликда қидирув ва литий қазиб олишга қизиқиш билдирдилар.

Бундан ташқари, KIGAM Президенти республикада литий карбонат ва литий гидроксид ишлаб чиқарадиган корхона қуриш режаларини эълон қилди.  

K.Шарлапаев Қозоғистон лойиҳаларни амалга ошириш учун зарур давлат томонидан қўллаб-қувватлаш чораларини кўришга тайёрлигини таъкидлади. Бундан ташқари, Астанада кенгайтирилган йиғилиш ўтказишга қарор қилинди.

Аввалроқ KIGAM “Казгеология” АЖ билан биргаликда Бакенное конларида геологик тадқиқотлар ва геофизик ишларни олиб борган. Ушбу конда қидирув ва қазиб олиш учун лицензия бериш масаласи кўриб чиқилмоқда.

Сурат: Қозоғистон Республикаси Саноат ва қурилиш вазирлиги