Мамыр айының соңында Қырғыз Республикасы Министрлер Кабинеті Төрағасының Бірінші орынбасары Әділбек Қасымалиев Мәскеуде өткен Еуразиялық экономикалық комиссия Кеңесінің (ЕЭК) кезекті отырысына қатысты.

Отырыс барысында тараптар Одақтағы экономикалық интеграцияны дамыту жөніндегі мәселелердің тізбесін қарады.

Атап айтқанда, Кеңес Еуразиялық экономикалық одаққа мүше мемлекеттерде 2029 жылға арналған темекі өнімдеріне акциздердің бірыңғай индикативтік мөлшерлемесін бекітті.

Сондай-ақ медициналық қолдануға арналған дәрілік заттарды тіркеу және сараптау қағидаларына өзгерістер енгізілді. Жаңа шешімге сәйкес тіркелген дәрілік препараттарға қатысты өзгерістердің әртүрлі түрлері үшін сараптама жұмыстарын жүргізу және тіркеу деректерін бағалау кезінде мүше мемлекеттердің уәкілетті органдарының әкімшілік рәсімдерді орындауын оңтайландыру мүмкіндігі пайда болды.

Отырыс шеңберінде қатысушылар тауарларды кедендік декларациялау практикасының мониторингі туралы есепті және «Еуразиялық экономикалық одаққа мүше мемлекеттердің аумақтарында «Шығыс — Батыс» және «Солтүстік-Оңтүстік»бағыттарында көлік инфрақұрылымын құру және дамыту туралы» 2023 жылғы баяндаманы тыңдады. Бұл бағыттар Қытайдың «Бір белдеуі, бір жол» бастамасымен ұштастырылған.