Өзбекстан Республикасынын башчысынын басма сөз кызматы билдиргендей, Шавкат Мирзиёев Ташкентте Кытайдын Мамлекеттик кеңешинин вице-премьер-министри Лю Гочжун жетектеген делегацияны кабыл алды. Кытай делегациясынын иш сапары өзбек-кытай өкмөттөр аралык кызматташуу комитетинин кезектеги жыйынына туш келди.

Тараптар көп кырдуу кызматташтыкты мындан ары өнүктүрүүнүн келечегин талкуулап, Өзбекстан менен Кытайдын ортосундагы стратегиялык өнөктөштүктү тереңдетүүгө басым жасашты. Жолугушуунун жүрүшүндө үстүбүздөгү жылдын январь айында Кытайга болгон жогорку деңгээлдеги визиттин жыйынтыгында жетишилген макулдашуулардын аткарылышына баа берилди.

Сүйлөшүүлөрдө комитеттин ишинин жемиштүү жыйынтыктары, соода жүгүртүүнүн жана тартылган инвестициялардын туруктуу өсүшү, ошондой эле үзгүлтүксүз авиакаттамдардын жана маданий иш-чаралардын жыштыгынын көбөйүшү белгиленди.

Соода балансын камсыздоого, өзбек продукциясын Кытай рыногуна жылдыруу үчүн жагымдуу шарттарды түзүүгө, экономиканын стратегиялык тармактарында маанилүү инвестициялык долбоорлорду ишке ашырууну тездетүүгө, ошондой эле аймактардын ортосундагы кызматташтыкты кеңейтүүгө, гуманитардык, билим берүү жана туризм программаларын ишке ашырууга өзгөчө көңүл бурулду.

Жолугушуунун катышуучулары ошондой эле транспорт инфраструктурасын өнүктүрүү жана өлкөлөр ортосундагы экономикалык байланыштарды чыңдоо үчүн жаңы перспективаларды ачкан Кытай-Кыргызстан-Өзбекстан темир жолун куруу долбоору боюнча иштин башталышы боюнча отчет менен таанышты.

Фото: Өзбекстан Республикасынын Президентинин басма сөз кызматы