Asl Belgisi raqamli markalash va tovarlarni kuzatish tizimi o‘tgan yil yakunlarini sarhisob qilib, turli toifadagi mahsulotlarda sezilarli o‘sishni qayd etdi. Mamlakatda jami 110,9 mingga yaqin nomdagi tovarlar markalandi.
Yetakchi toifalar maishiy texnika (67,5 ming nom), alkogol mahsulotlari (13 mingdan ortiq) hamda dori vositalari va tibbiy buyumlar (12 mingdan ortiq) bo‘ldi. Hududlar orasida markalangan tovarlar soni bo‘yicha Toshkent shahri (deyarli 89 ming nom) birinchi o‘rinni egalladi, undan keyin Toshkent viloyati (8,8 mingga yaqin) va Samarqand viloyati (3,9 mingdan ortiq) joylashdi.
Ayniqsa, dori vositalari va tibbiy buyumlar segmentida sezilarli o‘sish kuzatildi. Ushbu guruhdagi markalangan tovarlar aylanmasi ishtirokchilari soni 35 foizga, sotuvlar esa 19,5 barobarga oshdi. Eng ko‘p markalangan mahsulotlar orasida infuziya uchun eritmalar, og‘riq qoldiruvchi va yallig‘lanishga qarshi dori vositalari mavjud.
Maishiy texnika segmentida tizim ishtirokchilari soni 165 foizga, ro‘yxatdan o‘tkazilgan tovar nomlari soni esa 122 foizga oshdi. Markalangan mahsulotlar orasida eng ommaboplari lampalar va yoritish qurilmalari, televizorlar va muzlatgichlar bo‘ldi. 2024 yilda markalangan texnika savdosi 2023 yilga nisbatan 11 barobarga ko‘paydi.
Tamaki mahsulotlari bo‘yicha ishtirokchilar soni 15 foizga, ro‘yxatdan o‘tkazilgan tovarlar soni esa 51 foizga oshdi. Sotuvlar ikki barobarga ko‘paydi, bu esa ushbu toifadagi markalash tizimiga bo‘lgan qiziqishning barqarorligini ko‘rsatadi.
Ichimliklar segmentida keskin o‘sish qayd etildi. Ishtirokchilar soni 58 foizga oshdi, sotuvlar esa 1739,7 barobarga ko‘paydi. Eng katta ulush alkogolsiz ichimliklar (40,1%), tabiiy ichimlik suvi (23,2%) va energetik ichimliklar (8,6%) hissasiga to‘g‘ri keldi.
Alkogol mahsulotlari ham taraqqiyotni namoyish etmoqda: tizim ishtirokchilari soni 18 foizga, markalangan mahsulotlar savdosi esa 2,3 barobarga oshdi. Eng ko‘p markalangan tovarlar orasida kuchli spirtli ichimliklar, vinolar va konyaklar bor.
Pivo segmentida ishtirokchilar soni 16 foizga o‘sdi va sotuvlar 1,3 barobarga ko‘paydi.