O‘zbekiston 2027-yilga kelib to‘qimachilik hamda tikuv-trikotaj mahsulotlari eksportini 7 milliard dollarga yetkazishni rejalashtirmoqda. Bunday maqsadlar mamlakat prezidenti Shavkat Mirziyoyevning farmonida belgilangan.

2025-yilga kelib to‘qimachilik mahsulotlari yetkazib berish hajmi 4 milliard dollarga yetishi, 2026-yilda esa yana 1 milliard dollarga ko‘payishi kutilmoqda. Yevropa va AQSH bozorlariga alohida e’tibor qaratilib, ushbu hududlarga tayyor tikuv-trikotaj mahsulotlari eksporti hajmi 2027-yilga kelib 500 million dollarni tashkil etishi lozim.

To‘qimachilik eksporti umumiy hajmining kamida 70 foizini tayyor mahsulotlar tashkil etishi mo‘ljallangan. Ushbu maqsadlarga erishish uchun korxonalar 5 milliard dollar miqdorida xorijiy investitsiya va kreditlarni jalb qilishlari kerak bo‘ladi. Shuningdek, davlat tomonidan sohaga qo‘shimcha qo‘llab-quvvatlash mexanizmlari taqdim etiladi.

“O‘zbekistonda ishlab chiqarilgan” dasturi doirasida mahalliy ishlab chiqaruvchilar o‘z mahsulotlarini xalqaro onlayn savdo maydonchalarida bepul reklama qilish imkoniyatiga ega bo‘ladilar.