O‘zbekiston Fanlar akademiyasiga Tabiatni muhofaza qilish xalqaro ittifoqi (TMXI) vakillari — Sharqiy Yevropa va Markaziy Osiyo mintaqaviy byurosi direktori Oliver Avramoski hamda loyiha menejeri Lyubov Timofeeva tashrif buyurganini “Dunyo” axborot agentligi xabar qilmoqda. Mehmonlarni Fanlar akademiyasi vitse-prezidenti Shahlo Turdiqulova qabul qildi. Uchrashuvda shuningdek, Botanika instituti direktori, akademik Komiljon Tojiboyev va Zoologiya instituti ilmiy xodimlari ham ishtirok etdi.

Uchrashuvning asosiy jihatlaridan biri Oliver Avramoskining Toshkentda TMXI vakolatxonasini ochish niyati haqidagi bayonoti bo‘ldi. Ushbu tashabbus O‘zbekiston bilan tabiatni muhofaza qilish va ekologik ta’lim sohasidagi hamkorlikni mustahkamlashga qaratilgan. Fanlar akademiyasi qo‘shma ilmiy loyihalarni amalga oshirishga tayyorligini bildirdi.

TMXI bilan hamkorlik munosabatlarini yo‘lga qo‘yish O‘zbekistondagi tabiatni muhofaza qilish tashabbuslari uchun keng imkoniyatlar yaratadi. Bu Qizil kitobni takomillashtirish, biologik xilma-xillikni saqlash, cho‘llanish va iqlim o‘zgarishiga qarshi kurashish kabi masalalarga taalluqli. Shuningdek, ekologik ta’lim, mahalliy jamoalarni jalb etish va barqaror turizmni rivojlantirishga alohida e’tibor qaratilmoqda.