Senatorlar yalpi majlisda «Ekologik ekspertiza, atrof-muhitga ta’sirni baholash va strategik ekologik baholash to‘g‘risida»gi qonunni ma’qulladi. Ushbu hujjat ekologiya sohasidagi huquqiy me’yorlarni tizimlashtirishga va uni xalqaro standartlarga muvofiq tartibga solish mexanizmini takomillashtirishga qaratilgan.

Qabul qilingan qonun ekologik xavfsizlikni ta’minlash, tabiiy resurslardan oqilona foydalanish va aholi punktlarining sanitariya-ekologik holatini yaxshilashda muhim qadam bo‘ladi. U amaldagi huquqiy hujjatlarning tarqoqligini bartaraf etib, ularning izchilligini oshiradi hamda ekologik ekspertiza jarayonlarini soddalashtiradi.

Qonunda ekologik ekspertizaning asosiy tushunchalari va tamoyillari, jumladan davlat organlarining vakolatlari, atrof-muhitga ta’sirni baholash tartibi, strategik ekologik baholash va qaror qabul qilish jarayonida jamoatchilik ishtiroki mustahkamlangan. Shuningdek, ekologik me’yorlar loyihalarini ishlab chiqish va rasmiylashtirish tartibini belgilovchi qoidalar ham nazarda tutilgan.

Strategik loyihalarning atrof-muhitga ta’sirini baholash jarayonini xalqaro talablarga moslashtirish imkonini beradigan strategik ekologik baholash tizimini yaratishga alohida e’tibor qaratilgan. Bu, shuningdek, fuqarolarning qulay atrof-muhitga bo‘lgan huquqlarini ta’minlash va uning holati to‘g‘risida ishonchli ma’lumot olishlari uchun asos bo‘ladi.