O‘zbekistonning uchta universiteti ilk bor Times Higher Education (THE) World University Rankings 2025 by Subject xalqaro reytingida dunyoning eng yaxshi universitetlari ro‘yxatiga kiritildi. Ushbu yutuq respublikaning oliy ta’lim sohasidagi taraqqiyotini va mutaxassislar tayyorlash sifatini oshirish bo‘yicha amalga oshirilayotgan sa’y-harakatlarni aks ettiradi.

Toshkent irrigatsiya va qishloq xo‘jaligini mexanizatsiyalash muhandislari instituti (TIQXMMI) bir vaqtning o‘zida ikkita yo‘nalish bo‘yicha yetakchilar qatoridan joy oldi: “tabiiy fanlar, matematika va statistika” (301-400 o‘rin) hamda “muhandislik ishi” (501-600 o‘rin). Bu natija qishloq xo‘jaligi va muhandislik fanlari bo‘yicha mutaxassislar tayyorlashning yuqori darajasini tasdiqlaydi.

O‘zbekiston Milliy universiteti (O‘zMU) “Tabiiy fanlar, matematika va statistika” yo‘nalishida 601-800 o‘rinni egallab, jahon ta’lim hamjamiyatidagi o‘z mavqeini mustahkamladi. O‘zMUning reytingga kiritilishi uning milliy ta’limning yetakchisi ekanligini va fundamental fanlarni rivojlantirishga qo‘shgan hissasi e’tirof etilganini tasdiqlaydi.

Toshkent axborot texnologiyalari universiteti (TATU) “ta’lim” (601+) va “kompyuter fanlari hamda dasturlash” (1001+) yo‘nalishlari bo‘yicha reytingga kirdi. TATUning bu muvaffaqiyati O‘zbekistonning axborot texnologiyalari sohasidagi salohiyati tobora o‘sib borayotganini va yuqori malakali IT-mutaxassislarni tayyorlash borasidagi imkoniyatlarini ta’kidlaydi.