O‘zbekiston Prezidenti 2025-2027 yillarda elektrotexnika sanoatini jadal rivojlantirishga qaratilgan qarorni tasdiqladi. Yangi hujjat tarmoqni modernizatsiya qilish va mahalliy ishlab chiqaruvchilarni qo‘llab-quvvatlashga yo‘naltirilgan chora-tadbirlar majmuasini nazarda tutadi.

2025-yil 1-fevraldan sanoat kooperatsiyasi uchun yangi shartlar kuchga kiradi. Bojxona hududida qayta ishlash rejimi doirasida korxonalar mahsulotlarni keyingi qayta ishlash uchun boshqa ishlab chiqaruvchilarga yo‘naltirish imkoniyatiga ega bo‘ladi. O‘zbekistonda ishlab chiqarilmaydigan laboratoriya jihozlari va asboblar, agar ular korxonalar va ilmiy markazlar uchun zarur bo‘lsa, 2028-yilgacha bojxona to‘lovlaridan ozod etiladi.

Ilg‘or texnologiyalarni joriy etayotgan kompaniyalar uchun sezilarli soliq imtiyozlari ko‘zda tutilgan. Uch yilgacha bo‘lgan muddatga foyda solig‘ining nol stavkasi joriy etiladi, shuningdek, mol-mulk solig‘i bekor qilinadi. Investitsiya loyihalarini amalga oshirish uchun korxonalar ko‘chmas mulkni 10 yilgacha bo‘lgan muddatga bo‘lib-bo‘lib to‘lash sharti bilan sotib olish imkoniyatiga ega bo‘ladi.

Jizzax va Toshkent viloyatlarida muhandislik maktablari ochilishi muhim qadamlardan biri bo‘ladi. Eksport salohiyatini rivojlantirish uchun «Eltechexport‘ni moliyalashtirishning yangi yo‘nalishini yaratish, shuningdek, ichki va xalqaro kapital bozorlarida obligatsiyalar chiqarish rejalashtirilmoqda.

Ijtimoiy obyektlar uchun xaridlarga alohida e’tibor qaratilgan. Pudratchilar mahsulotlarni mahalliy ishlab chiqaruvchilardan Elektron kooperatsiya portali orqali sotib olishlari shart bo‘ladi, bu esa ichki bozorni yanada rag‘batlantiradi.