Polshaning Vistula universitetida O‘zbekistonning sayyohlik salohiyatini targ‘ib qilishga bag‘ishlangan yorqin tadbir o‘tkazildi, deb xabar bermoqda “Dunyo” axborot agentligi. Tadbir O‘zbekistonning Polshadagi elchixonasi va Polshadagi O‘zbek yoshlar klubi tomonidan uyushtirildi. Mehmonlar orasida universitet professor-o‘qituvchilari va talabalari, talabalar klublari vakillari, o‘zbek diasporasi a’zolari, shuningdek, turli soha mutaxassislari hamda olimlari bor edi.

O‘zbekistonning asosiy sayyohlik yo‘nalishlari tasvirlangan rang-barang bukletlar, diqqatga sazovor joylarning fotosuratlari va targ‘ibot materiallari taqdim etilgan stend alohida qiziqish uyg‘otdi. Madaniyat vazirligi, Toshkent farmatsevtika instituti va Toshkent kimyo-texnologiya instituti vakillaridan iborat O‘zbekiston delegatsiyasi mamlakatimizning boy madaniy merosi, zamonaviy taraqqiyoti va salohiyati haqida so‘zlab berdi.

Milliy o‘zbek musiqasining ijro etilishi tadbirga bayramona kayfiyat baxsh etdi. Polshalik ishtirokchilar an’anaviy kuylarni zavq bilan tinglashdi va O‘zbekistonning betakror madaniyatiga tahsin aytishdi.

Shuningdek, milliy merosni asrab-avaylash, Vatanga muhabbat va yurt oldidagi burch tuyg‘usini shakllantirish mavzusi muhokama qilindi. Ochiq muloqot doirasida ishtirokchilar zamonaviy dunyoda Vatan va uning madaniy o‘ziga xosligini himoya qilish masalalariga to‘xtalib o‘tdilar.