O‘zbekiston Migratsiya agentligi direktori Behzod Musayev va Tashqi ishlar vaziri o‘rinbosari Olimjon Abdullayev boshchiligidagi O‘zbekiston delegatsiyasi Qatar rahbariyati bilan mehnat migratsiyasi sohasidagi hamkorlikni chuqurlashtirish maqsadida muzokaralar olib bordi.

23-25 yanvar kunlari amalga oshirilgan tashrif doirasida O‘zbekiston delegatsiyasi Qatar Mehnat vaziri o‘rinbosari Shayxa Najva bint Abdurahmon Al Soniy, Tashqi ishlar vazirligi Konsullik departamenti direktori Muhammad bin Abdulloh Al-Subai hamda Migratsiya va pasport xizmati rahbari general Muhammad bin Ahmad ad-Dusariy bilan uchrashdi.

O‘zbekiston fuqarolari uchun viza tartib-qoidalarini soddalashtirish, ularning ish sharoitlarini yaxshilash, shuningdek, Qatar qonunchilik doirasida ularning huquqlarini himoya qilish masalalariga alohida e’tibor qaratildi. Qatar tomoni mamlakatda faoliyat ko‘rsatayotgan o‘zbekistonlik mutaxassislar sonini ko‘paytirishdan manfaatdor ekanligini ta’kidlab, ular uchun munosib ish o‘rinlari yaratishga tayyorligini bildirdi.

Tashrifning asosiy natijasi O‘zbekiston Migratsiya agentligi va Qatarning yirik rekruting kompaniyasi «Jusur» o‘rtasida hamkorlik to‘g‘risidagi bitim imzolanishi bo‘ldi. Hujjat sog‘liqni saqlash, neft-gaz sohasi, mehmonxona biznesi va xizmat ko‘rsatish kabi sohalarda malakali o‘zbekistonlik mutaxassislarni ishga joylashtirish masalalarini nazarda tutadi.