O‘zbekistonda ko‘p qavatli uylar qurilishini soddalashtirish va nazorat qilishga qaratilgan yangi qoidalar joriy etilmoqda. Endi pudratchilar loyihalarni “Shaffof qurilish” onlayn platformasi orqali kelishib olishlari mumkin bo‘ladi. Loyihalardagi barcha aniqlangan kamchiliklar jarayon davomida bartaraf etilishi mumkin, qurilishning loyihaga mosligi esa Qurilish sohasidagi nazorat inspeksiyasi tomonidan kuzatib boriladi. Inspeksiya obyekt qurib bitkazilgandan so‘ng yakuniy xulosani beradi.

Uy-joylarni foydalanishga topshirish jarayoni ham soddalashtirildi. Endi buning uchun faqat ikki idora: Qurilish inspeksiyasi va Yong‘in xavfsizligi boshqarmasining xulosasi talab etiladi. Zarur hollarda inspeksiya boshqa soha mutaxassislarini o‘z tashabbusi bilan jalb qiladi, bu esa ma’muriy tartib-qoidalarni sezilarli darajada kamaytiradi.

Bundan tashqari, ishonchli developerlarni jalb qilish maqsadida ko‘p qavatli uylar qurish uchun yer maydonlarini faqat QQS to‘lovchisi bo‘lgan yuridik shaxslarga kimoshdi savdosi orqali sotishga qaror qilindi.