O‘zbekistonda mast holatda transport vositasini boshqarganlik uchun jazo choralari kuchaytirilmoqda. Senat tomonidan ma’qullangan yangi qonun jarimalarni oshirishni hamda takroran qoidabuzarlik qilganlar uchun jinoiy javobgarlikni joriy etishni nazarda tutadi.

Ma’muriy javobgarlik to‘g‘risidagi kodeksning 131-moddasidagi amaldagi normaga ko‘ra, mast holda transport vositasini boshqarganlik uchun haydovchilar bazaviy hisoblash miqdorining 25 baravari (9,37 million so‘m) miqdorida jarima to‘laydi va 1,5 yildan 3 yilgacha muddatga transport vositasini boshqarish huquqidan mahrum etiladi. Kiritilayotgan o‘zgartirishlar jarima miqdorini bazaviy hisoblash miqdorining 40 baravarigacha (15 million so‘m) oshiradi, haydovchilik guvohnomasiga ega bo‘lmagan qoidabuzarlar uchun esa jarima miqdori bazaviy hisoblash miqdorining 50 baravarigacha (18,75 million so‘m) ko‘paytiriladi va 15 sutkaga ma’muriy qamoq jazosi saqlab qolinadi.

Qonun bilan Jinoyat kodeksiga yangi 261-1-modda ham kiritilmoqda. Endilikda transport vositasini alkogol yoki boshqa turdagi mastlik holatida takroran boshqarish 3 yilgacha muayyan huquqdan mahrum qilish, 2 yildan 3 yilgacha axloq tuzatish ishlari yoki xuddi shu muddatga ozodlikdan mahrum qilish kabi jinoiy javobgarlikka tortilishga sabab bo‘ladi.

Transport vositasini boshqarish huquqidan mahrum etilgan, biroq yana qonunni buzgan shaxslar uchun 261-2-modda kiritilmoqda. Bu modda bo‘yicha jazo bazaviy hisoblash miqdorining 50 baravaridan 100 baravarigacha (18,75 million — 37,5 million so‘m) jarima, 2 yilgacha axloq tuzatish ishlari yoki 2 yildan 3 yilgacha ozodlikdan mahrum qilishni nazarda tutadi.

Shuningdek, transport vositasini boshqarishni mast yoki haydovchilik guvohnomasiga ega bo‘lmagan shaxslarga topshirish uchun ham jazo choralari kuchaytirilmoqda. Jarima bazaviy hisoblash miqdorining 25 baravaridan 30 baravarigacha oshiriladi, takroran qoidabuzarlik uchun esa bazaviy hisoblash miqdorining 50 baravari miqdorida jarima yoki 15 sutkagacha ma’muriy qamoq jazosi belgilangan.