O‘zbekiston elchixonasi diplomatlari Yaponiyaning Nara shahriga tashrif buyurib, shahar meri Gen Nakagava bilan uchrashdi. Muzokaralarning asosiy mavzusi O‘zbekistonning madaniy va tarixiy merosiga bag‘ishlangan yirik ko‘rgazmaga tayyorgarlik ko‘rish doirasidagi hamkorlik bo‘ldi. Ushbu keng ko‘lamli tadbir 2027-yilda Nara milliy muzeyida o‘tkazilishi rejalashtirilmoqda.

Yaponiya tomoni tashkiliy masalalarda tez sur’atlar bilan rivojlanish kuzatilayotganini ta’kidladi va ko‘rgazma ikki mamlakat o‘rtasidagi do‘stlikni mustahkamlashda muhim bosqich bo‘lishiga ishonch bildirdi. Samarqand va Nara shaharlari o‘rtasidagi hamkorlikni rivojlantirishga alohida e’tibor qaratildi.

Tomonlar joriy yilning birinchi yarmida Yaponiya kompaniyalari delegatsiyasining Samarqandga tashrif buyurishi to‘g‘risida kelishib oldilar. Tashrif doirasida o‘zaro manfaatli loyihalarni muhokama qilish uchun biznes-forum va B2B uchrashuvlari o‘tkazilishi ko‘zda tutilgan.