Xaynan viloyatining ma’muriy markazi Xaykou shahrida O‘zbekistonning iqtisodiy, investitsiya va sayyohlik imkoniyatlariga bag‘ishlangan forum o‘tkazildi. Tadbir O‘zbekiston elchixonasi, Guanchjoudagi Bosh konsulxona va Xaynan savdo-sanoat palatasi tomonidan uyushtirildi.

Tadbirda 100 ga yaqin ishtirokchi, jumladan, vazirliklar, idoralar, savdo-sanoat birlashmalari, ishlab chiqarish va sayyohlik kompaniyalari hamda mintaqa ishbilarmon doiralari vakillari qatnashdi.

Taqdimot davomida O‘zbekistonning iqtisodiy o‘sishi, xorijiy investorlar uchun yaratilgan sharoitlar, shu jumladan erkin iqtisodiy va sanoat zonalari, shuningdek, mavjud soliq va bojxona imtiyozlari haqida ma’lumot berildi. Yangi istiqbolli investitsiya loyihalariga alohida e’tibor qaratildi.

Forum ishtirokchilari O‘zbekistonda biznes yuritishning afzalliklarini muhokama qildilar va ularni qiziqtirgan barcha savollarga javob oldilar. Tadbir doirasida mamlakatning turli sohalardagi salohiyatini ochib beruvchi video materiallar ham namoyish etildi.