O‘zbekiston elchisi Alisher To‘xtayev Pokistonning “Tabani Corp” kompaniyasi rahbari Abdul Rauf Tabani bilan uchrashuv o‘tkazdi. Suhbat davomida sanoat, savdo, axborot texnologiyalari va boshqa sohalarda qo‘shma loyihalarni amalga oshirish istiqbollari muhokama etildi. Xorijiy sarmoyadorlar va tadbirkorlar uchun qulay sharoitlar yaratishga alohida e’tibor qaratildi.

Abdul Rauf Tabani O‘zbekistondagi ijtimoiy-iqtisodiy o‘zgarishlarni yuqori baholab, mamlakatning barqaror iqtisodiyoti bilan ajralib turishini ta’kidladi. Uning aytishicha, bu yutuqlarga O‘zbekiston rahbariyatining uzoqni ko‘zlovchi siyosati va islohotlarni qo‘llab-quvvatlashi tufayli erishilgan.

“Tabani Corp” vakili O‘zbekiston bozoriga qaytish va ikki qardosh xalq o‘rtasidagi hamkorlikni mustahkamlashga hissa qo‘shish orqali mamlakatni rivojlantirishda faol ishtirok etish niyatini bildirdi.

Tomonlar to‘qimachilik sanoatida hamkorlik qilish va ilg‘or texnologiyalarni joriy etish bo‘yicha kelishuvga erishdilar. Shuningdek, qishloq xo‘jaligini raqamlashtirish va xizmat ko‘rsatish sohasini takomillashtirish bo‘yicha loyihalar ko‘rib chiqildi.