Markaziy Osiyo atrof-muhit va iqlim o‘zgarishini o‘rganish universitetida (Green University) landshaftlarni qayta tiklash imkoniyatlarini baholash (ROAM) hamda tabiatga asoslangan yechimlar (NbS) mavzusiga bag‘ishlangan kirish seminari o‘tkazildi. Tadbir Xalqaro tabiatni muhofaza qilish ittifoqi (IUCN) va O‘zbekiston Ekologiya vazirligi huzuridagi Atrof-muhit va tabiatni muhofaza qilish texnologiyalari ilmiy-tadqiqot instituti tomonidan yerdan foydalanishni yaxshilash va yerlarni qayta tiklashga qaratilgan FOLUR loyihasi doirasida tashkil etildi. Seminarda vazirliklar, xalqaro tashkilotlar vakillari va soha mutaxassislari ishtirok etdilar.
IUCNning Sharqiy Yevropa va Markaziy Osiyo bo‘yicha mintaqaviy ofisi direktori Oliver Avramoski global ekologik muammolarni hal qilishda qishloq xo‘jaligi hal qiluvchi ahamiyatga ega ekanligini ta’kidladi. Uning fikricha, qishloq xo‘jaligi jarayonlarini tabiat bilan uyg‘unlashtirish oziq-ovqat xavfsizligi, bioxilma-xillikni saqlash va iqlim o‘zgarishiga moslashish uchun nihoyatda muhimdir. U IUCN Tabiatga asoslangan yechimlar bo‘yicha global standart va ROAM metodologiyasini ilgari surish orqali O‘zbekistonni ushbu o‘zgarishlarda qo‘llab-quvvatlayotganini alohida ta’kidladi.
FOLUR loyihasi tabiatga asoslangan yechimlar yordamida degradatsiyaga uchragan yerlarni mahsuldor ekotizimlarga aylantirishning amaliy namunasini ko‘rsatmoqda. ROAM metodologiyasi NbS tamoyillariga muvofiqligini ta’minlagan holda tiklanishi zarur bo‘lgan ustuvor hududlarni aniqlash imkonini beradi. Bunday yondashuvlarni joriy etish tuproq holatini yaxshilash, unumdorlikni oshirish, eroziyani kamaytirish va suv zaxirasini ko‘paytirish imkonini beradi. Bu, shuningdek, uglerod tutib qolinishiga, bioxilma-xillikning ortishiga va mahalliy jamoalar barqarorligining mustahkamlanishiga yordam beradi.
Seminarning asosiy mavzularidan biri muhofaza etiladigan tabiiy hududlarni samarali boshqarishning global mezoniga aylangan IUCN Yashil ro‘yxatini targ‘ib qilish bo‘ldi. O‘zbekistonda tabiatni muhofaza qilishni kuchaytirish landshaftlarning ekologik yaxlitligini saqlash, ekotizim xizmatlarini yaxshilash va fermer xo‘jaliklarini qo‘llab-quvvatlashga xizmat qiladi.