Prezident Shavkat Mirziyoyev nogironligi bor shaxslarni parvarishlashning yangi tizimini joriy etish va manzilli ijtimoiy yordamni kuchaytirish bo‘yicha takliflar bilan tanishdi.

Asosiy o‘zgarishlardan biri “Ayollar daftari” va «Yoshlar daftari‘da ko‘zda tutilgan ijtimoiy yordamni ‘Kambag‘al oilalar reyestri‘ga bog‘lash bo‘ladi. Bu turli hududlardagi kam ta’minlangan fuqarolar va nogironligi bor shaxslar soniga mutanosib ravishda mablag‘larni taqsimlash imkonini beradi. Oilaning kambag‘al deb tan olinishi qo‘shimcha arizalar talab qilinmasdan, avtomatik tarzda ijtimoiy yordam olish uchun asos bo‘lib xizmat qiladi.

Ijtimoiy yordam tizimi o‘zgaradi: eskirgan va samarasiz choralar bekor qilinib, qo‘llab-quvvatlashning 28 turidan iborat yagona ro‘yxat tasdiqlanadi. Ijtimoiy daftarlar orqali davolash va jarrohlik amaliyotlarini moliyalashtirish Davlat tibbiy sug‘urta jamg‘armasiga o‘tkaziladi.

Nogironligi bor bolalarga g‘amxo‘rlik qilishga alohida e’tibor qaratildi. Davlat-xususiy sheriklik doirasida 3 yoshdan 18 yoshgacha bo‘lgan bolalar uchun kunduzgi parvarishlash xizmati joriy etiladi. Bunday muassasalarga qabul qilish ota-onalar bilan tuzilgan ijtimoiy shartnoma va psixologik-tibbiy-pedagogik komissiya xulosasi asosida amalga oshiriladi. Yil oxirigacha bu xizmat nogironlikning og‘ir shakliga chalingan 2 mingga yaqin bolani qamrab olishi kutilmoqda, bu esa ularning onalariga ishlash va o‘qish imkoniyatini beradi.

Imkoniyati cheklangan bolalarni reabilitatsiya qilishga tizimli yondashish maqsadida “Bolalar salomatligi” axborot tizimi ishga tushiriladi. U tibbiy, ta’lim va ijtimoiy xizmatlarni kompleks qo‘llab-quvvatlashni ta’minlaydi. Shuningdek, har bir bolaga davlat tomonidan subsidiya ajratiladi, kunlik parvarishlash xizmatlari uchun ota-onalar to‘lovi oyiga 3 million so‘mgacha soliqdan ozod etiladi.

Bundan tashqari, davlatimiz rahbari kambag‘allikka qarshi kurashish chora-tadbirlari bilan tanishdi. “Yetti imkoniyat va mas’uliyat” tamoyili doirasida oilalarning ijtimoiy-iqtisodiy holatini baholovchi “Kambag‘al oilalar reyestri” tizimi ishga tushirildi. U tufayli 48 ming nafar fuqaro ish bilan ta’minlandi, 10 mingdan ortig‘i kasb-hunarga o‘qitildi, 14 ming nafariga kredit va subsidiyalar berildi. 140 ming oilaga shifokorlar biriktirildi, 38 ming fuqaro ijtimoiy xizmatlardan foydalandi. 32 mingdan ziyod bola bog‘chalarga joylashtirildi, 7 mingga yaqin yosh oliy o‘quv yurtlariga kirish uchun tayyorgarlik ko‘rmoqda.