Uzbekistan Airways aviakompaniyasining Toshkentdan Nyu-Yorkka HY101 reysini bajarayotgan samolyotida kamdan-kam uchraydigan va ajoyib hodisa yuz berdi — parvoz davomida yo‘lovchining tug‘ruq jarayoni boshlandi.

Ekipaj boshlig‘i darhol ovoz kuchaytirgich orqali yordam so‘rab murojaat qildi va yo‘lovchilar orasida bo‘lgan ikki shifokor — akusher va jarroh chaqiriqqa javob berdi. Ularning tezkor harakatlari tufayli o‘g‘il bola dunyoga keldi.

Favqulodda vaziyat sababli ekipaj komandiri Islandiyaning Keflavik shahridagi eng yaqin zaxira aerodromga majburiy qo‘nishga qaror qildi. Qo‘ngandan so‘ng, samolyotga tibbiyot xodimlari ko‘tarilib, zarur yordam ko‘rsatishdi va ona hamda chaqaloqni mahalliy shifoxonaga joylashtirishdi.

E’tiborga molik jihati shundaki, bu quvonchli voqea Uzbekistan Airways aviakompaniyasining 33 yillik to‘yi kuni sodir bo‘ldi. Aviakompaniya baxtli oilani tabriklab, ekipaj va tibbiyot mutaxassislariga ularning kasbiy mahorati va tezkor harakatlari uchun minnatdorchilik bildirdi.