Kon-qazilma sanoati va geologiya vazirligida Yaponiyaning Sumitomo Corporation kompaniyasi vakillari bilan uchrashuv bo‘lib o‘tdi. Muzokaralarda vazir o‘rinbosarlari A.Qodirxo‘jayev va U.Yusupov, shuningdek, “O‘zbekiston texnologik metallar kombinati” AJ boshqaruv raisi F.Abdullayev ishtirok etdi. Yaponiya tomonidan Sumitomo Corporation strategik biznes bo‘linmasi bosh direktori Masateru Takada boshchilik qildi.

Uchrashuv davomida Sumitomo Corporation vakillari kompaniya faoliyati, uning asosiy yo‘nalishlari va strategiyalarini taqdim etdilar. O‘zbekiston tomoni esa o‘z navbatida delegatsiyani investitsiyalar sohasidagi qonunchilik, moliya siyosatining o‘ziga xos jihatlari va yer qa’ridan foydalanuvchilarga geologik obyektlarni taqdim etishning shaffof mexanizmlari bilan tanishtirdi. Xalqaro standartlarga muvofiq investorlar uchun qulay sharoit yaratishga alohida e’tibor qaratildi.