O‘zbekiston Bosh vaziri o‘rinbosari — iqtisodiyot va moliya vaziri Jamshid Qo‘chqorov Britaniyaning Standard Chartered banki bosh ijrochi direktori Saif Malik bilan muzokaralar olib bordi. Uchrashuvning asosiy mavzusi infratuzilma loyihalari, elektr tarmoqlarini modernizatsiya qilish hamda kichik va o‘rta biznesni qo‘llab-quvvatlash sohasidagi hamkorlikni rivojlantirish masalalari bo‘ldi.

60 dan ortiq mamlakatda faoliyat yuritadigan Standard Chartered savdo va investitsiya operatsiyalariga ixtisoslashgan, shuningdek, “yashil” tashabbuslarni faol moliyalashtiradi. Uchrashuv davomida tomonlar bankning davlat-xususiy sheriklik dasturlaridagi ishtiroki, davlat ishtirokidagi korxonalarni transformatsiya qilish va moliya bozorlaridagi tendensiyalarni muhokama qildilar. O‘zbekiston banklari bilan hamkorlik istiqbollari va qishloq xo‘jaligini rivojlantirish masalalari ham ko‘rib chiqildi.

Energetika sohasiga, xususan, “yashil” energiya ishlab chiqarish, qayta tiklanuvchi energiya manbalaridan foydalanishni kengaytirish va axborot texnologiyalari sohasini rivojlantirishga alohida e’tibor qaratildi. Muzokaralar yakunida tomonlar sheriklikni mustahkamlash va ustuvor yo‘nalishlarda hamkorlikni kengaytirish niyatida ekanliklarini tasdiqlashdi.