O‘zbekistonda “yashil” innovatsion texnologiyalardan foydalanib, energiya samaradorligini oshirish va barqaror issiqlik ta’minotini ta’minlash mavzusida davra suhbati o‘tkazildi. Tadbir Bosh vazir o‘rinbosari — iqtisodiyot va moliya vaziri Jamshid Qo‘chqorov rahbarligida bo‘lib o‘tdi va unda xalqaro moliya institutlari, vazirlik hamda idoralar vakillari ishtirok etdi.

Markazlashtirilgan isitish tizimini isloh qilish, energiya yo‘qotishlarini kamaytirish, qayta tiklanuvchi energiya manbalarini joriy etish va zamonaviy energiya tejaydigan texnologiyalarni qo‘llash muhokamalarning asosiy mavzulari bo‘ldi. Ta’kidlanishicha, mavjud infratuzilmaning har tomonlama tahlili tezkor yechim talab qiladigan bir qator muammolarni aniqladi. Shu munosabat bilan issiqlik ta’minotini barqaror rivojlantirish va binolarni modernizatsiya qilishga qaratilgan Prezident qarori loyihasini kiritish to‘g‘risida qaror qabul qilindi.

Hujjat Jahon banki, Yevropa tiklanish va taraqqiyot banki, Osiyo taraqqiyot banki hamda Xalqaro energetika agentligining tavsiyalari asosida ishlab chiqildi. Xalqaro ekspertlar, jumladan, Jahon bankining infratuzilma bo‘yicha mintaqaviy direktori Charlz Korme va mintaqaviy energetika menejeri Stefani Gil energiya samaradorligini oshirish strategiyalarini taqdim etishdi. Muhokamada, shuningdek, BMTTD, IFC va GIZ vakillari ham ishtirok etib, isitish sohasida “yashil” texnologiyalarni moliyalashtirish mexanizmlarini taklif qilishdi.

Issiqlik xizmatlari sifati va ishonchliligini oshirish, ijtimoiy obyektlarni modernizatsiya qilish, xorijiy investitsiyalarni jalb etish va energiya samaradorligining yangi bozorini shakllantirish masalalariga alohida e’tibor qaratildi.