O‘zbekiston Iqtisodiyot va moliya vazirligida Jahon bankining Yevropa va Markaziy Osiyo bo‘yicha infratuzilma loyihalari mintaqaviy direktori Charlz Korme boshchiligidagi delegatsiya bilan uchrashuv o‘tkazildi. Muzokaralarda Jahon bankining Markaziy Osiyo bo‘yicha mintaqaviy direktori Tatyana Proskuryakova, iqtisodiyot va moliya vaziri birinchi o‘rinbosari Ilhom Norqulov hamda vazirlikning boshqa vakillari ishtirok etdilar.

Tomonlar barqaror isitish tizimini yaratish, energiya samaradorligini oshirish va qayta tiklanuvchi energiya manbalarini joriy etishga alohida e’tibor qaratgan holda issiqlik infratuzilmasini modernizatsiya qilish istiqbollarini ko‘rib chiqdilar. Shuningdek, zamonaviy texnologiyalarni jalb etish va issiqlik nasoslaridan foydalanishni kengaytirish masalalari ham muhokama qilindi.

Yashil iqtisodiyotni rivojlantirish, shaharlashtirish jarayonlari va renovatsiya loyihalariga alohida e’tibor qaratildi. Xususiy sektor ishtirokida issiqlik nasoslarini mahalliy ishlab chiqarish istiqbollari hamda isitish tizimini modernizatsiya qilishda Jahon banki tajribasidan foydalanish imkoniyatlari ko‘rib chiqildi.