Senat Kengashining 28 yanvar kungi majlisida kambag‘allikdan xoli hududga aylantirilayotgan Qo‘shrabot tumanining ijobiy tajribasi taqdim etildi.

So‘nggi yillarda O‘zbekistonda mintaqalar o‘rtasidagi iqtisodiy tengsizlikni kamaytirish bo‘yicha faol harakatlar amalga oshirilmoqda. 2023-yildan boshlab 5-toifaga kiritilgan Qo‘shrabotda tadbirkorlarni qo‘llab-quvvatlashning maxsus tartibi joriy etilgan. Ikki yil ichida biznesga 12,7 milliard so‘mlik soliq imtiyozlari berildi, natijada 700 ga yaqin yangi korxona va 1000 ta ish o‘rni yaratildi.

Tumandagi iqtisodiy o‘sish diqqatga sazovor. Investitsiya dasturi doirasida 35,4 million dollarlik 41 ta loyiha ishga tushirilib, o‘zlashtirilgan xorijiy investitsiyalar hajmi 23,6 million dollarga yetdi. Eksport 3,5 million dollarni tashkil etdi, sanoat 109,5 foizga, qurilish 114,5 foizga, xizmat ko‘rsatish sohasi 112,4 foizga, qishloq xo‘jaligi esa 105,9 foizga o‘sdi.

Mahallalarni rivojlantirishga alohida e’tibor qaratilmoqda. Tadbirkorlik tashabbuslariga 54,2 milliard so‘m imtiyozli kreditlar va 1,5 milliard so‘m subsidiyalar ajratildi. Natijada 10 ta mahalla sanoat va agrar markazlarga aylantirilib, 1200 nafar aholi rasmiy ishga joylashtirildi. “Kambag‘allikdan farovonlikka” dasturi tufayli 2023 yil oxiriga kelib, tumanda kambag‘allik darajasi 16,2 foizdan 7,9 foizga tushdi, 2,3 ming oila (10,7 ming kishi) og‘ir ahvoldan chiqishga erishdi.

Biroq, ijobiy o‘zgarishlar bilan bir qatorda, hal etilmagan muammolar ham mavjud. Xususan, 2021-2022-yillarda tashkil etilgan uchta kichik sanoat zonasidan ikkitasida zarur infratuzilma yo‘qligi sababli loyihalar hali ham amalga oshirilmagan. To‘rtta bo‘sh turgan ko‘chmas mulk narxi pasaytirilgani va auksionlar o‘tkazilganiga qaramay, xaridor topilmayapti.

Shuningdek, subsidiya tizimidan to‘liq foydalanilmayapti: o‘tgan davr mobaynida mavjud 30 turdagi subsidiyalardan faqat 3-4 tasi talab qilingan, 6 ta mahallada esa umuman berilmagan. Jismoniy shaxslarning mol-mulk va yer to‘lovlari bo‘yicha soliq qarzdorligi 7,4 foizga oshgan.

Senatorlar “Kambag‘allikdan farovonlikka” dasturi ijrosini nazorat qilishni kuchaytirish zarurligini ta’kidladilar. Takliflar orasida kam ta’minlangan oilalarning tibbiy yordam va ta’limdan foydalanish imkoniyatini ta’minlash, yirik investitsiya loyihalarini elektr energiyasi bilan uzluksiz ta’minlash, shuningdek, tadbirkorlarni bo‘sh turgan davlat obyektlaridan foydalanishga faol jalb etish kabi masalalar bor.