O‘zbekistonda mahallalarda xavfsiz muhit yaratish va huquqbuzarliklarning oldini olish tizimi samaradorligini oshirishga qaratilgan tashabbuslar amalga oshirila boshlandi. Bu chora-tadbirlar davlat rahbarining 2025-yilda qabul qilingan qarorida nazarda tutilgan.

Ushbu ish doirasida Buxoro viloyatida IIV Akademiyasining tajribali professor va o‘qituvchilaridan tashkil topgan ishchi guruhi tomonidan tadqiqot o‘tkazilmoqda. Ular hududlardagi kriminogen vaziyatni o‘rganib, jinoyatchilikni oldini olish bo‘yicha zamonaviy uslublarni ishlab chiqmoqda.

Viloyat hokimi Botir Zaripov, Milliy gvardiya qo‘mondoni Rustam Jo‘rayev, IIV Akademiyasi boshlig‘i Rustam Xotamov hamda turli idora va tashkilotlar vakillari ishtirokida yig‘ilish bo‘lib o‘tdi. Unda huquqbuzarliklarni erta aniqlash va oldini olish chora-tadbirlari hamda bu boradagi ishlarni samarali tashkil etish masalalari muhokama qilindi.

Viloyatning barcha tumanlarida mahalliy hokimiyat vakillari va kriminogen jihatdan eng murakkab mahallalardan “mahalla yettiligi” a’zolari bilan sayyor uchrashuvlar o‘tkazildi. Vaziyat tahlili natijasida “qizil” va “sariq” toifaga kiritilgan 29 ta mahallada 96 ta jinoyat o‘chog‘i aniqlandi. Tadqiqot yakunida vaziyatni yaxshilash bo‘yicha tavsiya va takliflar ishlab chiqildi.