O‘zbek mahsulotlari, jumladan za’faron, quritilgan mevalar va sabzavotlar yaqin kelajakda Avstriya bozorida paydo bo‘ladi. Bu haqda BMB HOLDING xoldingi kuzatuv kengashi raisi Bekzod Mamatqulov boshchiligidagi delegatsiyaning 26-27 yanvar kunlari Venaga tashrifi davomida muzokaralar olib borildi.

Avstriyalik hamkorlar bilan uchrashuvlarda O‘zbekiston mahsulotlarini Yevropaga eksport qilish masalalari ko‘rib chiqildi. “Agrotec Handels” kompaniyasi rahbari Boris Kandov bilan ikki mamlakat o‘rtasidagi tovar ayirboshlash hajmini oshirish imkonini beruvchi Venada qo‘shma korxona tashkil etish bo‘yicha kelishuvga erishildi.

Shuningdek, Avstriya Iqtisodiyot palatasi vakillariga BMB HOLDING faoliyati, uning mahsulotlari, eksport imkoniyatlari va xalqaro standartlarga muvofiqligi haqida batafsil ma’lumot taqdim etildi. Avstriya tomoni o‘zbek za’faroni, quritilgan mevalar va sabzavotlarni yetkazib berishga qiziqish bildirdi hamda ushbu mahsulotlarga bo‘lgan talabning yuqoriligini ta’kidladi.