5 маусымда Өзбекстан Республикасының Президенті Шавкат Мирзиеев Дүниежүзілік сауда ұйымының (ДСҰ) Бас директоры Нгози Оконджо-Ивеаламен кездесу өткізді.

ДСҰ басшысы Өзбекстанның Дүниежүзілік сауда ұйымына кіру жөніндегі күш-жігеріне қолдау білдірді.

Кездесу барысында Өзбекстанның ДСҰ-ға кіруі бойынша қабылданып жатқан шаралар қаралды. Қазіргі уақытта мүше елдермен келіссөздер жүргізілуде, ауыл шаруашылығын қолдау шарттарын талқылау басталды, сондай-ақ ұлттық заңнаманы ДСҰ нормалары мен ережелерімен үйлестіру жұмыстары жалғасуда.

Сондай-ақ, «жасыл» экономиканы, электрондық сауданы дамытуда және цифрлық қызметтер экспортын ұлғайтуда ынтымақтастық қажеттігі атап өтілді. Кездесу аясында Өзбекстанда ДСҰ қолдауымен «сауда саясаты саласындағы құзыреттілік орталығын» құру ұсынылды.

Президент Нгози Оконджо-Ивеалаға «дөңгелек үстелге» қатысқаны және Өзбекстан жоғары оқу орындарының студенттерімен кездескені үшін алғыс айтты.

Фото: Өзбекстан Республикасы Президентінің баспасөз қызметі