Qishloq xo‘jaligi vazirligi kotibiyati rahbari Shamshod Ergashev boshchiligidagi O‘zbekiston delegatsiyasi Malayziyaga ish safari bilan tashrif buyurdi. Tashrif doirasida “O‘zbekiston va Malayziya o‘rtasidagi strategik hamkorlik” mavzusida davra suhbati o‘tkazildi, unda tomonlar agrar sohadagi qo‘shma loyihalarni muhokama qilib, bir qator kelishuvlarga erishdilar.

Asosiy kelishuvlardan biri — Meraque Group Sdn Bhd bilan hamkorlikda Yangiyo‘l tumanida kichik pilotсiz qishloq xo‘jaligi texnikalarini ishlab chiqarishni yo‘lga qo‘yish bo‘ldi. Bundan tashqari, tomonlar O‘zbekistonda Malayziya baliq turlarini tajriba tariqasida ko‘paytirishga kelishib oldilar. Bu esa intensiv baliqchilikni joriy etish yo‘lidagi muhim qadam hisoblanadi.

Savdo aloqalarini mustahkamlash maqsadida Malayziya qishloq xo‘jaligi marketingi agentligi (FAMA) O‘zbekiston mahsulotlarini eksport qilishda ko‘maklashadi. Shuningdek, tabiiy kauchuk ishlab chiqarish uchun ko‘chatlar import qilish va Malayziyaga o‘zbek ipagini yetkazib berish hajmini oshirish rejalashtirilgan.

Hamkorlikning istiqbolli yo‘nalishlaridan biri O‘zbekistonda qora, uzun donli, xushbo‘y va aerob guruchning Malayziya navlarini yetishtirish bo‘ldi. O‘z navbatida, o‘zbek devzira guruchini Malayziyaga eksport qilishga tayyorgarlik ko‘rilmoqda.

Qo‘shimcha ravishda Malayziya fermerlar akademiyasi va O‘zbekiston qishloq xo‘jaligi ta’limi instituti o‘rtasidagi hamkorlik, shuningdek, Malayziyada sinovdan o‘tkazish uchun o‘zbek qovuni seleksiyasi masalalari muhokama qilindi.