O‘zbekiston Energetika bozorini rivojlantirish va tartibga solish agentligida Yevropa tiklanish va taraqqiyot banki (YeTTB) ko‘magida tashkil etilgan Mo‘g‘uliston delegatsiyasi bilan uchrashuv o‘tkazildi. Muhokamaning asosiy mavzusi energetika sohasidagi islohotlar va qayta tiklanuvchi energiya manbalarini joriy etish masalalari bo‘ldi.

Mo‘g‘uliston tomoni muqobil energetika sohasida tenderlar o‘tkazish bo‘yicha O‘zbekiston tajribasini o‘rganishga qiziqish bildirdi. Muzokaralar davomida o‘zbekistonlik mutaxassislar 2017-yildan beri amalga oshirilayotgan islohotlar haqida ma’lumot berdilar. Bular orasida yagona energetika kompaniyasini to‘rtta ixtisoslashgan tuzilmaga ajratish va bozor modeliga bosqichma-bosqich o‘tish kabi masalalar ham bor edi.

Mo‘g‘uliston delegatsiyasining tashrifi YeTTBning qayta tiklanadigan energetika sohasiga investitsiyalar jalb qilish orqali mamlakat energetika tarmog‘ini rivojlantirish tashabbusi doirasida uyushtirildi. Mo‘g‘uliston vakillari O‘zbekistonda olib borilayotgan ishlar alohida e’tibor uyg‘otishini va ular o‘z mamlakatlarida ham shunga o‘xshash yechimlarni joriy etish uchun asos bo‘lishi mumkinligini ta’kidladilar.