Havo hujumidan mudofaa qo‘shinlari va Harbiy havo kuchlari qo‘mondonligida Mudofaa vazirligi tomonidan “Zahiriddin Muhammad Bobur izidan” ko‘rik-tanlovi tashkil etildi. Ishtirokchilar nafaqat Bobur hayoti va harbiy mahorati haqidagi bilimlarini namoyish etishdi, balki yuksak aqliy va ma’naviy salohiyatlarini ham ko‘rsatishdi.

Tanlov uch bosqichdan iborat edi. Unda harbiy xizmatchilar Bobur shaxsiyati, uning strategik dahosi va tarixiy merosi haqidagi bilimlarini namoyon etdilar. Temuriylar tarixi davlat muzeyi ilmiy xodimlari va Toshkent davlat sharqshunoslik universiteti o‘qituvchilaridan tashkil topgan hay’at ishtirokchilarning chiqishlarini baholadi.

Qizg‘in kurashda “Everest” jamoasi g‘olib bo‘ldi, ikkinchi o‘rinni “Samo qalqonlari”, uchinchi o‘rinni esa “Yashil kamon” jamoasi egalladi. Tanlov “Turon” davlat harbiy teatri aktyorlari tomonidan tayyorlangan buyuk sarkarda hayotiga bag‘ishlangan sahna asari bilan yakunlandi.