Qoraqalpog‘istonda Orol dengizi havzasining quyi oqimidagi yemirilgan yerlar holatini yaxshilash loyihasi davom etmoqda. Fransiya taraqqiyot agentligi (AFD) va Yevropa investitsiya banki (EIB) tomonidan moliyalashtirilayotgan tashabbusning ikkinchi bosqichi doirasida Qoraqalpog‘iston Respublikasi Vazirlar Kengashi Raisi Farhodbek Ermanov AFD yetakchi mutaxassisi Paskal Duard boshchiligidagi ekspertlar delegatsiyasi bilan uchrashdi.

Asosiy e’tibor “yashil” iqtisodiyot tamoyillarini joriy etish, hududni barqaror rivojlantirish va agrar sohani zamonaviylashtirish masalalariga qaratildi. Qishloq xo‘jaligida ilg‘or texnologiyalarni qo‘llash va xo‘jalik yuritishning ekologik toza usullarini kengaytirish istiqbollari muhokama etildi.

Tashrif davomida Qoraqalpog‘istonning sakkizta tumanida loyihaning texnik-iqtisodiy masalalarini muhokama qilish uchun uchrashuvlar o‘tkazish ko‘zda tutilgan. Loyihani amalga oshirishning ikkinchi bosqichida tender asosida tanlab olingan ONFI va Rahmanov Partners tashkilotlari hal qiluvchi rol o‘ynaydi.