Toshkentda O‘zbekiston texnik jihatdan tartibga solish agentligi direktori Akmal Jumanazarov Saudiya Arabistonining Favqulodda va Muxtor Elchisi Yusuf al-Utaybiy bilan uchrashdi. O‘zbekiston Tashqi ishlar vazirligi bilan hamkorlikda tashkil etilgan suhbatda texnik jihatdan tartibga solish, metrologiya, standartlashtirish va muvofiqlikni baholash sohalarida hamkorlik istiqbollari muhokama etildi.

Ikki mamlakat o‘rtasidagi hamkorlik energetika, fuqaro aviatsiyasi, turizm, qishloq xo‘jaligi, sog‘liqni saqlash va mehnat munosabatlari sohalarida faol rivojlanayotgani qayd etildi. Ishtirokchilar ikki tomonlama hamkorlik sifatini oshirish uchun texnik jihatdan tartibga solishning muhimligini ta’kidladilar.

Uchrashuvda Saudiyaning ACWA Power kompaniyasi bilan qo‘shma kalibrlash laboratoriyasini ishga tushirish kabi istiqbolli loyihalar taqdimoti o‘tkazildi. Shuningdek, savdodagi texnik to‘siqlarni bartaraf etish va ishbilarmonlik aloqalarini kengaytirish uchun qulay sharoitlar yaratish imkonini beradigan Saudiya standartlashtirish, metrologiya va sifat tashkiloti (SASO) bilan hamkorlikni chuqurlashtirish masalalariga ham e’tibor qaratildi.