Mazkur hujjat suv resurslaridan oqilona foydalanish, suv xo‘jaligini samarali boshqarish hamda suv yetkazib beruvchilar va iste’molchilarning mas’uliyatini oshirish uchun yagona huquqiy mexanizm yaratishga qaratilgan.

Kodeksni ishlab chiqish jarayonida suv resurslarini muhofaza qilish bo‘yicha kompleks va muvofiqlashtirilgan chora-tadbirlarni joriy etish, suvni tejaydigan texnologiyalarni rag‘batlantirish va suvdan foydalanish uchun ruxsatnomalar olish tartibini soddalashtirish ko‘zda tutilgan. Shuningdek, ushbu sohada davlat-xususiy sheriklik mexanizmlarini kengaytirish va suvni iste’molchilar o‘rtasida taqsimlashning yangi tamoyillarini tatbiq etish rejalashtirilgan.

24-yanvar kungi muhokamada deputatlar suv olish tartibini buzganlik uchun jarima sanksiyalari masalalariga alohida e’tibor qaratdilar. Ushbu normalar qizg‘in bahs-munozaralarga sabab bo‘ldi va xalq vakillari bir qator takliflar kiritdilar.

Parlament a’zolarining fikricha, kodeksning qabul qilinishi suvdan foydalanish samaradorligini oshirish, sohaga investitsiyalarni jalb qilish va uni texnologik jihatdan modernizatsiya qilishni jadallashtirish imkonini beradi.

Loyiha uchinchi o‘qishda ma’qullanib, Senatga yo‘llantirildi.