Toshkentda 30-yanvardan 7-fevralgacha barcha yosh toifalari o‘rtasida armrestling va para-armrestling bo‘yicha Jahon kubogi o‘tkazilmoqda. Musobaqada Hindiston, Qozog‘iston, Qirg‘iziston, Tojikiston, Mo‘g‘uliston, Ukraina, Belarus va Xitoy kabi turli mamlakatlardan 300 ga yaqin nogironligi bo‘lgan sportchilar ishtirok etdi.

Para-armrestling bo‘yicha O‘zbekiston terma jamoasini Qoraqalpog‘istondan olti nafar sportchi tashkil etdi, ulardan ikkitasi medal sohibi bo‘ldi. 50 kg vazn toifasida To‘rtko‘l tumani sport maktabi tarbiyalanuvchisi M. Artiqboyeva o‘ng qo‘l bilan kurashda g‘oliblikni qo‘lga kiritib, oltin medalga sazovor bo‘ldi. 100 kilogrammgacha bo‘lgan vazn toifasida N. Xo‘jamuratov o‘ng va chap qo‘lda yuqori natija ko‘rsatib, bronza medalini qo‘lga kiritdi.