O‘zbekistonda har uch yilda demografik, ijtimoiy va iqtisodiy omillarni hisobga olgan holda oziq-ovqat mahsulotlarini iste’mol qilish me’yorlari yangilanib turiladi. Bu qoida Prezident Shavkat Mirziyoyev imzolagan ‘Oziq-ovqat xavfsizligi to‘g‘risida‘gi yangi qonunda o‘z aksini topgan.

Mazkur hujjat aholini xavfsiz va sifatli oziq-ovqat mahsulotlari bilan ta’minlash, shuningdek, oziq-ovqat ishlab chiqarish sohasida bozor mexanizmlarini rivojlantirish masalalarini tartibga soladi. Vazirlar Mahkamasi ushbu sohada davlat siyosatini amalga oshirish bilan shug‘ullanadi hamda oziq-ovqat ta’minotidagi ehtimoliy uzilishlarga tezkor choralar ko‘radi.

Qishloq xo‘jaligi vazirligi oziq-ovqat xavfsizligini ta’minlashga mas’ul organ etib belgilangan. Davlat dasturining asosiy vazifasi aholining ijtimoiy ahamiyatga ega tovarlarga bo‘lgan ehtiyojini qondirish maqsadida mahalliy mahsulotlar va xomashyo ishlab chiqarishni ko‘paytirishdan iborat.

Qonun rasmiy e’lon qilingan kundan boshlab olti oy o‘tgach kuchga kiradi.