Jahonga mashhur Samarqand noni geografik ko‘rsatkich sifatida rasman ro‘yxatdan o‘tkazildi. Adliya vazirligi 4-fevral kuni tegishli hujjatni rasmiylashtirdi va uni Samarqand viloyati hokimi vazifasini bajaruvchi Adiz Boboyevga topshirdi. Topshirish marosimi adliya vaziri Akbar Toshqulov ishtirokida o‘tkazildi.

Geografik ko‘rsatkichning ro‘yxatga olinishi Samarqand nonining betakrorligi va uning hudud bilan chambarchas bog‘liqligini tasdiqlaydi. ‘Geografik ko‘rsatkichlar to‘g‘risida‘gi qonunga ko‘ra, sifati, shuhrati yoki boshqa xususiyatlari ma’lum bir geografik kelib chiqishiga bog‘liq bo‘lgan mahsulotlar bunday maqomga ega bo‘ladi.

Endi Samarqand noni rasmiy himoyaga ega bo‘ldi, bu esa uning an’anaviy tayyorlanish usullarini saqlab qolish va xalqaro miqyosda tanilishini oshirish imkonini beradi.