2025-yil 6-fevral kuni Rajabboy Ahmadzoda boshchiligidagi Tojikistonning So‘g‘d viloyati delegatsiyasi Namanganga ish tashrifi bilan keldi.

Tashrif doirasida Tojikiston vakillari G‘urumsaroy tumanidagi 4 ming gektar maydonni egallagan zamonaviy bog‘ni ko‘zdan kechirdilar. “NURAN” kompaniyasi tomonidan barpo etilgan ushbu bog‘ tomchilatib sug‘orish tizimi hamda mevali daraxtlar yetishtirish uchun zamonaviy agrotexnologiyalar bilan jihozlangan.

Tomonlar bog‘dorchilik va qishloq xo‘jaligi sohasidagi hamkorlik istiqbollarini muhokama qilishdi, shuningdek, qo‘shma loyihalarni amalga oshirish va ilmiy almashinuvlarni rivojlantirish bo‘yicha kelishuvga erishdilar. Mazkur tashrif O‘zbekiston va Tojikiston o‘rtasidagi do‘stlik va strategik sheriklik munosabatlarini yanada mustahkamlash yo‘lidagi navbatdagi qadam bo‘ldi.