Qozog‘iston Majlisi O‘zbekiston bilan “Markaziy Osiyo” xalqaro sanoat hamkorlik markazini tartibga solish to‘g‘risidagi bitimni tasdiqladi. Loyiha doirasida xitoylik investor meva-sabzavotlarni qayta ishlash zavodi qurish va zamonaviy omborxona majmualarini barpo etish niyatida.

Qozog‘iston savdo va integratsiya vaziri Arman Shaqqaliyev kelishuvning ikki tomonlama hamkorlik doirasida imzolanganini ma’lum qildi. Uning aytishicha, Turkiston viloyatida allaqachon xitoylik hamkorlar bilan muzokaralar olib borilmoqda va qayta ishlash zavodidan tashqari, yangi omborxonalar hamda boshqa sanoat inshootlarini qurish rejalashtirilgan.

Markaz yuk oqimlarini birlashtirish va qayta ishlash bo‘yicha eng yirik maydonga, shuningdek, Shimol — Janub yo‘lagining asosiy bo‘g‘iniga aylanadi. U “Atameken” va “Guliston” nazorat-o‘tkazish punktlari yonida bir kvadrat kilometr maydonda joylashadi, shundan 50 gektari Qozog‘istonga ajratilgan. Hududda logistika infratuzilmasi, omborxonalar va mahsulotlarni qayta ishlash zavodlari barpo etiladi.

Bundan tashqari, markaz doirasida mashinasozlik, metallga ishlov berish va farmatsevtika sohalarida yangi ishlab chiqarish korxonalarini ishga tushirish rejalashtirilgan. Loyihalar byudjet mablag‘larini jalb qilmasdan, investorlar hisobidan amalga oshiriladi.

Markazni 2026-yilning to‘rtinchi choragida texnik jihatdan ishga tushirish rejalashtirilgan.