Bugun Ijtimoiy moslashuv reabilitatsiya markazidagi bolalar uchun alohida kun bo‘ldi. “Humo” xokkey klubi o‘yinchilari “Nomad” jamoasi bilan o‘yindan so‘ng rekord darajadagi ayiq yog‘ilishi vaqtida yig‘ilgan 1312 ta yumshoq o‘yinchoqni ularga shaxsan topshirishdi. Aksiyada Konstantin Kozlovskiy, Javohir Rasulov, Artyom Gryaznov, Yegor Shpak, shuningdek, O‘zbekiston yoshlar terma jamoasi a’zolari ishtirok etdi.
2021-yildan beri Toshkentda spinal mushak atrofiyasidan aziyat chekayotgan bolalarning hayot sifatini qo‘llab-quvvatlash va maxsus uskunalar uchun mablag‘ to‘plovchi SMA Umid jamg‘armasi ayiq yog‘ilishini tashkil etmoqda. Jamg‘arma vakili Mavluda Asqarxo‘jayevaning aytishicha, yig‘ilgan o‘yinchoqlar saralanib, Toshkent shahri, Toshkent viloyati, Navoiy va Farg‘ona vodiysidagi bog‘chalar, maktabgacha ta’lim muassasalari, maktab-internatlarga yuboriladi. O‘yinchoqlar faqat allergiya xavfi bo‘lmagan muassasalarga beriladi.
Spinal mushak atrofiyasi (SMA) kam uchraydigan va xavfli kasallik bo‘lib, O‘zbekistonda yaqin vaqtgacha sog‘liqni saqlash sohasida kam e’tibor qaratilgan edi. Bugungi kunda rasmiy statistik ma’lumotlarga ko‘ra, 188 nafar bolada ushbu tashxis qo‘yilgan, ammo hududlarga borganda bu raqam ancha yuqori bo‘lishi mumkin. Buning asosiy sababi genetik mutaxassislarning yetishmasligi va erta bosqichlarda tashxis qo‘yish darajasining pastligi bo‘lib, bu ko‘pincha noto‘g‘ri tashxisga va natijada samarasiz davolanishga olib keladi.
Hozirgi kunda SMAni tashxislash laboratoriyalari Toshkent va Farg‘onada faoliyat yuritmoqda, yaqin orada Samarqandda yana bir laboratoriya ochilishi rejalashtirilgan. Mintaqaviy qo‘llab-quvvatlash butun mamlakat bo‘ylab oilalar uchun tashxis va yordam olish imkoniyatini ta’minlashda muhim rol o‘ynaydi.
Jismoniy cheklovlarga qaramay, ko‘plab SMAli bolalar normal aqliy qobiliyatlarini saqlab qoladilar. Ular ijod qilishlari, aqliy qobiliyatlarini rivojlantirishlari va hatto mental arifmetikada yaxshi natijalar ko‘rsatishlari mumkin.
Markaz zalini to‘ldirgan yumshoq o‘yinchoqlar bolalarda chinakam quvonch uyg‘otdi. Ularning ko‘zlari quvonchdan porlardi, kulgi esa yo‘laklarda taralar edi. Har kuni murakkab sinovlarni yengib o‘tishga majbur bo‘lgan bolalar uchun bunday e’tibor haqiqiy bayramga aylandi.
“Ularning tabassumlarini ko‘rish bebaho. Bunday lahzalar bizga sport nafaqat musobaqa, balki xayrli ishlar qilish imkoniyati ekanligini eslatib turadi,” — dedi xokkeychilardan biri.
Respublika bolalar ijtimoiy moslashuvi markazi 2004-yildan buyon faoliyat ko‘rsatib, ijtimoiy himoyaga muhtoj bolalarni qo‘llab-quvvatlab kelmoqda. Bu yerda ularga moslashish, tibbiy, psixologik va huquqiy yordam ko‘rsatiladi.
Markazning bolalar nevrologi Madina Alimova o‘z taassurotlari bilan o‘rtoqlashar ekan, ishidagi eng yoqimli narsa bolalarning rivojlanishini ko‘rish ekanligini ta’kidladi. “Har qanday yutuq, hatto eng kichik yutuq ham bizning g‘alabamizdir. Bola oldinga qadam qo‘yganida, biz nima uchun mehnat qilayotganimizni tushunamiz,” — dedi u.
Maxsus ehtiyojli bolalar bilan ishlash katta sabr-toqatni talab qiladi, ammo shifokorlar bundan ilhom oladilar. “Biz ularni bemor sifatida emas, balki o‘ziga xos xususiyatlarga ega bolalar sifatida qabul qilamiz. Asosiysi, natijaga e’tibor qaratish va ularning har bir muvaffaqiyatidan quvonishdir,” — deya qo‘shimcha qildi mutaxassis.
Xokkeychilarning bu tashrifi shunchaki aksiya emas, balki e’tibor va g‘amxo‘rlik mo‘jizalar yaratishi mumkinligini eslatadi. Axir ba’zida oddiy yumshoq o‘yinchoqni quchoqlash bolada iliqlik va qo‘llab-quvvatlash hissini uyg‘otishi mumkin.
