Бишкекте Кыргыз Республикасынын Соода-өнөр жай палатасы тарабынан уюштурулган эки күндүк “Текстиль жана логистика – 2025” эл аралык жарманкеси ачылды.

Иш-чарага текстиль жана тигүү өндүрүшчүлөрү гана эмес, ошондой эле тиешелүү тармактардын – насыялоо, камсыздандыруу, транспорт жана логистикалык кызматтардын өкүлдөрү да чогулушту.

Шаар тургундары үчүн жарманке ата мекендик бренддердин продукциясын түздөн-түз өндүрүүчүлөрдөн сатып алууга эң сонун мүмкүнчүлүк болду.

КР Соода-өнөр жай палатасынын вице-президенти Мамасадык Бакировдун айтымында, мындай иш-чаралар жеңил өнөр жайын жана логистикалык секторду өнүктүрүүдө, бизнес-диалог үчүн шарттарды түзүп, сатуу рыногун кеңейтүүдө негизги ролду ойнойт.

Жарманкенин конокторунун арасында Орусия, Казакстан жана Өзбекстандан келген өкүлдөр болду. Россиянын Кыргыз Республикасындагы Соода өкүлүнүн орун басары Дмитрий Ифко Кыргызстандын тигүү тармагы активдүү трансформация стадиясында турганын баса белгиледи: логистикалык чынжырларда олуттуу өзгөрүүлөр болуп, жаңы базарлар пайда болуп, ЕАЭБ алкагында кызматташуунун заманбап форматтары киргизилүүдө.

Форумдун бизнес программасына ири платформалардын жана сервистердин – Ozon, Wildberries, TikTok өкүлдөрүнүн, ошондой эле салык, транспорт, камсыздандыруу жана санариптик маркетинг чөйрөсүндөгү эксперттердин баяндамалары кирди.

Жарманке эртең өз ишин улантып, катышуучуларга ишкердик байланыштарды чыңдоо, продукцияларды кеңири аудиторияга тартуулоо жана жаңы өнөктөштөрдү табуу мүмкүнчүлүгүн берет.