Bishkekda Qirg‘iziston Respublikasi Savdo-sanoat palatasi tomonidan tashkil etilgan ikki kunlik “To‘qimachilik va logistika – 2025” xalqaro yarmarkasi ochildi.

Tadbirda nafaqat to‘qimachilik va tikuvchilik ishlab chiqaruvchilari, balki tegishli sohalar – kreditlash, sug‘urta, transport va logistika xizmatlari vakillari ham ishtirok etdi.

Yarmarka shahar aholisi uchun mahalliy brendlar mahsulotlarini bevosita ishlab chiqaruvchilardan xarid qilish uchun ajoyib imkoniyat bo'ldi.

Qirg‘iziston Respublikasi Savdo-sanoat palatasi vitse-prezidenti Mamasadiq Bakirovning ta’kidlashicha, bunday tadbirlar yengil sanoat va logistika sohasini rivojlantirish, ishbilarmonlar bilan muloqot qilish uchun shart-sharoit yaratish va savdo bozorlarini kengaytirishda muhim ahamiyat kasb etmoqda.

Yarmarka mehmonlari orasida Rossiya, Qozog‘iston va O‘zbekiston vakillari ham bor edi. Rossiyaning Qirgʻiziston Respublikasidagi savdo vakili oʻrinbosari Dmitriy Ifko Qirgʻiziston tikuvchilik sanoati faol oʻzgarishlar bosqichida ekanini taʼkidladi: logistika tarmoqlarida jiddiy oʻzgarishlar roʻy bermoqda, yangi bozorlar paydo boʻlmoqda, YeOII doirasidagi hamkorlikning zamonaviy formatlari joriy etilmoqda.

Forum ishbilarmonlik dasturidan eng yirik platformalar va xizmatlar – Ozon, Wildberries, TikTok vakillari, shuningdek, soliq, transport, sug‘urta va raqamli marketing sohasidagi ekspertlarning chiqishlari o‘rin olgan.

Yarmarka ertaga o‘z ishini davom ettirib, ishtirokchilarga biznes aloqalarini mustahkamlash, mahsulotlarni kengroq auditoriyaga taqdim etish va yangi hamkorlar topish imkonini beradi.